Así foi o Nadal 2016-2017 de Barafunda

Queremos facer un pequeno repasiño polas festas do Nadal 2016-2017 de Barafunda, das que aínda estamos a recuperarnos… Foi un nadal moi intenso que non tería sido posible sen o equipazo barafundeiro ao que queremos dar unha e mil veces AS GRAZAS!!

Comezamos lembrando o Parque Xurásico de Nadal, no que ademáis da Dinoescola e o Volcán, levamos a cabo a decoración xurásica, e do que xa vos falamos nesta outra entrada do blogue.

Durante todas as festas estivemos na Zona Náutico, facendo todo tipo de manualidades e divertidísimas animacións de rúa:

Recibimos ás Súas Maxestades os Reis Magos de Oriente (aos auténticos) no Corte Inglés e no Auditorio do Concello de Vigo:

E moitas moitas cabalgatas!!! Estivemos en Vigo, na Dinocabalgata, co noso Globosauro, que deu moito que falar:

 
En Rianxo, na fermosa cabalgata con temática mariñeira (Fotos de A Fiestra):
@s nos@s cascarolos desfilaron por Padrón acompañad@s por uns Ogros moi amables:

Polas rúas de Arzúa andiveron Pinocho e compañía derrochando ledicia!!

E as nosas pompeiras encheron Santiago de Compostela de pompas de xabón e de sorrisos!!

Deixamos no tinteiro contacontos, festas e algunha que outra animación de Nadal que fixemos e de todo aquilo que non temos documentos gráficos!! Pero así vos facedes unha idea, grosso modo, de cómo foi o Nadal de Barafunda. 
Comezamos esta entrada dando as grazas e queremos rematala do mesmo xeito. MOITÍSIMAS GRAZAS a tódalas persoas que traballades con nós e a tódalas que confiades en Barafunda, pois nada desto tería sentido sen vós!!

Máis de 10000 globos… Montaxe do Parque Xurásico de Nadal

Estes días o hall do Auditorio Mar de Vigo, converteuse no Parque Xurásico de Nadal!! 
Desde Barafunda estamos moi moi satisfeit@s co resultado da decoración xurásica, pero sobre todo, estamos contentísim@s co equipazo de montaxe que durante tres días dérono todo sen perder o sorriso nin a enerxía en ningún momento!!
Para tod@s el@s, un milleiro de grazas!! É un verdadeiro pracer traballar agusto e conseguir resultados tan ESPECTACULARES!! 

Foron moitas horas de traballo, máis de 10000 globos inflados, moito esparadrapo nas mans, pero… cremos que o esforzo valeu a pena!!  Agora tócalles desfrutar aos cativos e cativas da casa!!
E a vós?? Que vos parece o resultado final?

 


O Censor de Monstros

Novo conto de Barafunda Editorial!!!

O pasado 3 de decembro presentabamos no Culturgal o noso novo conto, O censor de monstros, escrito por Patricia G. Varela e ilustrado por David Bastos. 
Agora, énchenos de orgullo (e satisfacción) comunicarvos que xa podedes atopar O Censor de Monstros nas librarías!!
Escaparate da libraría A Pita Cega (Vigo)

Ven coñecer a Leda e máis co seu avó Cristovo os moitos monstros e seres fantásticos que viven por toda Galicia. Vivirá algún preto de ti e aínda non o sabes?

E como o avó Cristovo é un moderno, tamén abriu un blogue e un twitter no que irá contando as súas viaxes e aventuras!! Non lle perdades a pista!! 

O día do Apalpador

Xa levamos uns aniños participando desta festa tan bonita adicada ao noso benquerido Apalpador! Este ano non iamos ser menos! 
 O venres 23 de decembro o Casco Vello de Vigo prepárase para recibir á figura máis senlleira do Nadal galego! Obradoiros, contacontos, música, baile, castañas e moitas máis sorpresas para recibir ao Apalpador!! 
Botádelle un ollo ao cartaz tan bonitiño e non perdades detalle de tódalas actividades:
Ademais sodes moitas e moitos @s que preguntades onde podedes facervos cunha camisola do Apalpador, pois o venres estarán á venda por 10 euriños. Bulide porque… quítannolas das mans!! 

Pepiña Maruxiña quere voar, o libro!!

Por fin podemos anunciar que Pepiña Maruxiña quere voar xa é un conto ilustrado!!



Moitos coñecedes a historia desta xoaniña a través do noso contacontos, que xa leva nada máis que catro anos percorrendo auditorios, centros escolares, festas privadas… de toda Galicia.



Dende Barafunda editorial, no noso compromiso coa literatura infantil en galego, estivemos moitos meses traballando neste novo proxecto. Pepiña Maruxiña quere voar é o noso terceiro conto infantil ilustrado e agardamos que teña o mesmo éxito que os anteriores.

Para a súa presentación estaremos venres, sábado e domingo no Culturgal 2013 (Pazo da Cultura de Pontevedra). Alí o poderedes adquirir en primicia mentres non chega ás máis de 100 librerías de toda Galicia polas que o distribuiremos. 



No noso stand, ademais de amosar o noso traballo realizaremos diferentes actividades para todos vós: maquillaxe infantil, visita do Apalpador, obradoiro de globoflexia… 

Agardamos veros a todos no noso espacio do Culturgal! Como aperitivo, aquí vai o vídeo promocional do noso novo proxecto:



Agardamos que vos guste tanto como cariño puxemos para facer realidade este conto 🙂

III Xira Interestelar

Como algúns sabedes, tódolos anos facemos un percorrido por distintas vilas galegas para que os nosos espectáculos cheguen a todos vós.  A este percorrido chamámoslle “XIRA INTERESTELAR”, e xa imos pola terceira edición!!
Este ano, como novidade, engadimos novos espectáculos!!

As datas para esta III Xira Interestelar son:

20 de outubro, Pepiña Maruxiña quere voar, en Arbo:


17 de novembro, A maxia de Xabi, en Cotobade:


23 de novembro, A maxia de Xabi, en Mondariz:



24 de novembro, KeTKjas, en Gondomar:


Con entradas populares (2,50€ para Gondomar, 3€ para o resto de actuacións) para que ninguén quede sen gozar dos espectáculo!!


Agardámoste!!!

Novo vídeo do espectáculo KeTKjas

Trala súa estrea o 5 de maio deste mesmo ano, aquí ensinámosvos o vídeo do noso espectáculo KeTKjas. 

Un novo show para toda a familia, en especial para os máis pequenos. Da unha volta de rosca ás rutinas máis cotiáns do baño. O aseo matutino pode converterse nunha auténtica odisea, se o fai o pallaso Pico. Dende unha perspectiva escatolóxica chea de humor e tenrura, a caca, o cu, o peido e o pis, cobran un novo significado.

¿Que vos parece?

Campamento Pirata Illa de San Simón

Hoxe mesmo ábrese o prazo de incrición para o Campamento Pirata Illa de San Simón!!


Esta actividade nace para cubrir a demanda dun campamento de verán de calidade, onde a oferta de actividades atraintes xunto cun entorno único fagan deste campamento unha experiencia inolvidable e enriquecedora. 

O campamento é do 1 de xullo ó 7 de xullo. Está destinado a rapaces e rapazas de 7 a 12 anos interesados en vivir grandes aventuras cheas diversión, á vez que fan novos amigos. 

O emprazamento escollido é a Illa de San Simón (Redondela), en plena Ría de Vigo. 

Dentro da Illa faremos uso das súas instalacións, que inclúen dormitorios dobres con baño propio, aulas multiusos, comedor, e todo o necesario para unha estancia agradable e cómoda tras xornadas diarias cheas de actividade e divertimento.



 Durante os sete días que dura o campamento, realizaranse numerosas actividades entre as que cabe destacar:

  • Actividade en kayak
  • Actividade de vela
  • Búsqueda do tesouro de Francis Drake
  • Actividades creativas
  • Xogos
  • Obradoiros
  • Veladas
  • Olimpiadas piratas
  • Espectáculo de maxia (Mago Xabi)
Todo o equipo de monitores son especialistas nas distintas áreas e posúen amplia experiencia. Todos eles están coordinados por un director que está respaldado por un equipo  de profesionais formado por educadores e monitores e directores de tempo libre. 
O prezo é de 250€ todo incluído:
  • aloxamento en habitación dobre con baño propio
  • servizo de comedor
  • actividades de campamento e náuticas
  • seguro de responsabilidade civil
  • seguro federativo en actividades náuticas
  • póliza de accidentes
  • servizo de evacuación permanente
  • dispoñibilidade dun barco para o transporte dende a Illa e ata a Illa.
As prazas son limitadas para os primeiros 50 participantes en inscribirse. Podes descargar a ficha de inscripción aquí: 
Para calquera información adicional podedes escribirnos a barafunda@barafundaanimacion.com ou chamar ó 986 221 218. 



Espectáculos no Colexio Nosa Señora de Lourdes (A Estrada)

O pasado día 24 estivemos no Colexio Nosa Señora de Lourdes (A Estrada) con dous espectáculos.

Para os máis pequenos, os alumnos de educación infantil, representamos o espectáculo “Pepiña Maruxiña quere voar“. 


Click aquí para ver máis fotos


Despois, para os alumnos de educación primaria levamos o espectáculo “Preséntame un pallaso“. 

Click aquí para ver máis fotos


O asombro, a alegría e a tenrura que transmiten estes espectáculos reflectiuse nas caras dos  alumnos e profes durante toda a xornada. 

Dende aquí queremos agradecer ó Colexio, e especialmente ó ANPA,  por contar con nós para facer dese día un día diferente e, sobre todo, moi especial.